Che sunse pa?

Che sunse pa?

Descriziun

Le Sorvisc ai Jogn Val Badia é dal 1985 incá na istituziun por le sostëgn sussidiar ales porsones, ai grups, ales uniuns, ales assoziaziuns y istituziuns che se dá jö cun le laur por y cun la jonëza de nosta valada. Dlungia chësc operëiel sciöche rapresentanza di interesc dla sozieté y dla politica y sciöche interlocutur por les ghiranzes di mituns y di jogn. Dal 2016 incá gestësc le Sorvisc ai Jogn Val Badia ince le Zënter dla jonëza y dla cultura “SaJ.un” che é da ciafé tla Ciasa dla Cultura a La Ila. Chësc é partí sö te trëi pert: le gran salf d’incuntada y manifestaziuns, le local “boulder” y n local por bands da fá proes.
Dal 2020 incá gestësc le Sorvisc ai Jogn Val Badia ince la ciasa di jogn “Ütia de Pütia” (www.ütiadepütia.com) sön Börz, adöm cun la Cöra da Balsan. Chësta strotöra pó gní adorada da grups y lies por mëte da jí süa ativité.

Raiun de laur

Dl raiun de laur dl Sorvisc ai Jogn Val Badia fej pert i cin’ comuns dla Val Badia: Corvara, Badia, La Val, San Martin y Mareo, sciöche ince les Ploanies da Corvara, Calfosch, San Ciascian, La Ila, Badia, La Val, Rina, San Martin, Antermëia, Lungiarü, Al Plan y La Pli. Te chësc raiun ciara le Sorvisc ai Jogn Val Badia da ti jí adincuntra ai debojëgns y dejiders dla jonëza, cun l’aiüt de tröc volontars.

Por nüsc mituns y nosta jonëza...

  • laurunse fora y coordinun proiec y ativités;
  • acompagnunse y sostignun i volontars y i moltiplicadus fora por i paisc te vigni comun;
  • sostignunse y daidun impara tla creaziun de grups nüs;
  • organisunse incuntades y coordinun la rëi che reverda le laur por y cun la jonëza;
  • coordinunse proiec y manifestaziuns spezifiches che i reverda;
  • se dunse da fá por n laur de publizité;
  • dunse consëis pro domandes burocratiches y iuridiches;
  • sunse de sorvisc sciöche mediadú por problems desvalis;
  • metunse a jí proiec de prevenziun tles scores;
  • metunse a desposiziun de vigni sort de material informatif y injins;

N valgünes de nostes ofertes é...

  • sorvisc d’imprëst de material de documentaziun, de jüc, injins por organisé manifestaziuns, sciöche ince de n pulmin y cotan d’ater;
  • acompagnamënt, educaziun y sostëgn di rapresentanc dles 47 uniuns mëmbres che laora fora por i paisc;
  • organisaziun autonoma o en colaboraziun cun d’atres istituziuns de proiec sciöche “Isté deboriada”, “Cool summer”, “My summer”, “Laur davert por la jonëza”, “JABA”, “Festival dla jonëza dles valades ladines”, “Edema di jogn” y cotan d’atri;
  • organisaziun de cursc de formaziun o manifestaziuns sciöche i “Dis de preparaziun al maridé” o la “Festa dla majera eté”;
  • colaboraziun cun uniuns di mituns y jogn te deplü aziuns de benefiziënza, sciöche p.ej. “calëndri d’Advënt dla SKJ”, “aziun di Trëi Resc”;
  • pröma consulënza por temesc che reverda la jonëza;

plü informaziuns sot a www.jogn.org