La ciasa de mi soms

Descriziun

Co ciara pa fora la ciasa de tü soms? Aste bele ponsé do a ci che te oresses fá da gran?

Sce al te sá bel da lauré cun le lëgn o sce te oresses porvé fora val’ de nü, spo vi a nes daidé fá sö na bela ciasa adöm cun n profescionist. I adorun tüa creativité, vëia da lauré, paziënza y tröpa curiosité. Ci bela sodesfaziun canche te realisëies val’ cun tües mans.

Canche i un rové da fá sö nosta ciasa, podarunse sambëgn ince la decoré y la depënje sciöche al nes sá le plü bel. Chësc é n "Team Work", porchël saraste tres en compagnia y al ne manciará dessigü nia le devertimënt cun tröpes matades.

Chësta é la dërta ocajiun da capí sce le laur da artejan podess ester val’ por te.
Ci aspeteste pa? Fá para y lascete ite tl monn dl artejanat.

Chëst' edema vëgn metüda a jí adöm ala uniun
"ARTEJANAT VAL BADIA".