Isté deboriada

N isté plëgn de devertimënt, movimënt alaleria y tëmp da passé en compagnia. Al vëgn pastelné, fat jüc, esperimënc y de vigni sort de jites. I mituns á la poscibilité da fá esperiënzes nöies, da amplié sües competënzes y se svilupé te süa personalité. Por nos él important che vignun, cun sü interesc y debojëgns se stais saurí tl grup, por podëi insciö passé de bi dis deboriada.

Por i geniturs che scrí ite mituns cun debojëgns particolars (fisics, psichics, soziai o ater), pitunse la poscibilité da organisé na incuntada denanche le proiet mëtes man, por imparé a conësce miú le möt. Insciö podunse integré al miú i partezipanc y ti dé le sostëgn che ai adora.

Important: Tla pröma fasa d’iscriziun (dai 7 ai 13 de merz 2022) él ma la poscibilité da scrí ite definitivamënter le partezipant a döes edemes (tan inant che al é lerch). Pro les atres edemes rovará le partezipant te n pröm momënt sön lista d’aspeta (poscibilité da dé dant le degré de priorité); al ciafará spo na conferma, tan inant che al é lerch, ai 14-15 de merz.

Sce al é pro n program bele gnü arjunt le numer mascim de partezipanc, él la poscibilité da se lascé mëte sön la lista d’aspeta. Chësc vëgn aconsié por podëi eventualmënter reagí y injunté edemes, tan inant che al é poscibl por l’organisaziun.

COVID 19:

Les ativités programades pó mudé cina dan le mëteman, aladô dles mosöres de segurëza scrites dant dala Provinzia o dal Stat.

Sce n’ativité mëss por rajuns dl COVID-19 gní mudada daldöt y ara ne respidlëia en general nia plü ci che vëgn pité al momënt dl’iscriziun, á le partezipant la poscibilité da desdí süa partezipaziun tl momënt ch’al vëgn comuniché le program definitif. Te chësc caje vëgnel retü le contribut d’iscriziun.
A vigni moda vëgn le contribut d’iscriziun retü sce l’ativité vëgn desdita da pert dl’organisaziun.

Cun l’iscriziun a un di proiec #isté22 se detlarëia le partezipant/le genitur a öna da tigní ite les normes en cunt dl’igiena y dla sanité, metüdes dant dales autorités competëntes o dal’organisaziun, al momënt dl’esecuziun dl’ativité, sciöche p.ej. tigní sö le mascherot, tigní ite destanzes, fá n test asvelt o PCR, mostré sö le 3G o le 2G y.i.i.

Por che l’ativité pois gní fata, mëssel gní arjunt le numer minim de 8 partezipanc.